Masobra sa 348,000 ka dose sang Covid-19 vaccines ang nag-abot kaina sang aga para sa Negros Occidental kag Bacolod City.
306,060 diri ang para sa Negros Occidental. AstraZeneca, Sinovac kag Pfizer vaccines ang nag-abot para sa probinsya, kag Pfizer kag AstraZeneca naman ang para sa Bacolod.
Suno kay provincial administrator Rayfrando Diaz, ang nag abot nga AstraZeneca ang kabahin sa ginbakal nga bakuna sang probinsya. Padayon ang kampanya sa pag pabakuna kag karon mas may pilian sa mga bakuna nga nag abot.
Base sa utlilization rate, ang mga gina padala nga bakuna sa mga banwa kag siudad ang naga kaubos kag suno kay Diaz nagakasayuran nga mas madamo na ang mga naga pabakuna ukon maayo na ang acceptance rate sini.
Samtang padayon naman ang registration para sa pagbakuna sang mga 12 anyos tubtob 17 anyos. Wala pa sang abiso ang Negros Occidental gikan sa Department of Health kun san-o maga sugod ang pagbakuna sa menor de edad pero handa ang probinsya sa tion nga ipatuman ini.