May nagdugang nga tatlo ka nag-file sang reklamo batuk sa konsehal sang La Castellana kag sa isa ka Bacolod resident angut sa police recruitment scam.
Sa karon suno kay Col Leo Pamittan ang provincial director sang Negros Occidental PNP, nagdangat na sa onse ka reklamo ang na-file batuk sa kay konsehal Donato Dumaguit kag isa nga ginkilala kay Mary Jun Delos Santos angut sa ila nga pag facilitate sang job application sa PNP kabaylo sang bayad.
Padayon ang case build-up suno kay Pamittan sa idalom sang DOJ Circular 20 kun sa diin ang mga prosecutor kag mga pulis ang nagapasiguro nga may mabakod nga kaso.
Nagapabilin sa Prosecutor’s Office ang reklamo kag naga hulat pa nga ma-file sa korte.
Damlag pa ginsiling nga may 47 ka mga tagreklamo.
Ang iban gina hulat pa ang ila tagsa ka affidavit. Samtang, lima na ka sunod-sunod nga session nga wala maka tambong sa konseho si Dumaguit.
Suno kay La Castellana Mayor, Rhummyla Nicor-Mangilimutan may aksyon na ang konseho kag iya na lamang gina hulat sa iya nga talatapan ang tikang sang Sangguniang Bayan.
Ginahaylo niya si Dumaguit nga atubangon ang mga reklamo batuk sa iya.
Wala naman nag hatag pa sang pahayag ang alkalde angut sa mga ginahaboy sa iya ni Dumaguit nga akusasyon magluwas na lamang kun ini suno sa iya ang na-file sa naga kaigo nga forum.