Bacolod-DSSD magapalab-ot sang fire, burial assistance kag psycho-social intervention sa nalisdan nga pamilya sa nagluntad nga sunog sa Brgy 1.
Magluwas sa food kag medical assistance, magapalab-ot sang kapin P15,000 nga fire assistance ang Bacolod – DSSD para sa pamilya Gutierrez nga nasunugan sang balay sa Purok Lison sa Barangay 1, Martes sang kaagahon.
Nalakip na diri ang burial assistance ilabi na nga duha ka mga menor de edad ang napatay sa sunog.
Ginsiling ni DSSD head Richelle Verdeprado-Mangga nga nagpadulong na sa pamilya sang nasunugan ang mga staff para magbulig sa nalisdan nga ma-proseso ang kinahanglan nga requirements para sa ginapaabot nga ayuda halin sa siudad.
Kabahin sa ayuda nga ginapalab-ot sang siudad ang hospitalization para sa 63-anyos nga lolo nga nasamaran sa sunog.
Sarang man magpalab-ot sang psycho-social intervention ang DSSD sa mga nahalitan sang sunog.
Nagapasalig ang DSSD nga mas pabaskugon pa ang kampanya angut sa pag-amlig sa mga kabataan sa mga komunidad agud nga mapaiway ang kasubong nga trahedya.