Department of Health ang padayon nga nagapahanumdum sa publiko nga likawan ang pagtumar sang bulong nga Ivermectin kontra Covid-19.
Nangin topiko sang virtual online program sang DOH Western Visayas nga isyung bakuna ang mga dapat mahibaluan sang publiko angut sa Ivermectin.
Ginpahayag sang vice chancellor for academic affairs sang University of the Philippines – Visayas nga si Dr. Philip Ian Padilla nga indi pa aprubado sang Food and Drug Authority ang Ivermectin bilang isa ka bulong kontra Covid-19.
Ini sa tunga sang pagduso sang pila ka mga pulitiko kag doktor sang Ivermectin bilang anti-viral drug.
Suno kay Dr. Padilla, isa ini ka anti-parasitic drug nga masami ginagamit sa mga sapat gani mahimo may negatibo nga mga epekto sa lawas sang tawo.
Iya pa gindugang nga indi pa nagakiago ang mga pagtuon sa abroad nga nagapamatuod sang efficacy sang Ivermectin kontra Covid-19.
Para kay Padilla, ang bakuna lang sa karon ang pinaka epektibo nga pangontra sang isa ka persona batuk sa virus.