Temporaryo nga wala nagapatuman sang impounding sang mga ido ang Bacolod City Veterinary Office bangud puno na ang dog pound sang siudad nga nahamtang sa Barangay 35.
Ginsiling ni Dr. Janine Sarthou, Assistant City Veterinarian nga isa ka gatos ka mga ido lamang ang sarang nga ma-accommodate sang dog pound, apang sa karon nagdangat na sa 107 ang yara sa sulod sang pasilidad.
Bangud sini, wala na naga pang impound ang CVO sa mga barangays. Dugang pa ni Sarthou, ang mga ido nga ginasuspetsuhan may rabies kag ang mga layaw nga ido sa mga eskwelahan ang ila man sa gihapon pangdakpon agud malikawan nga makapanghalit sa publiko.
Nagpanugyan naman si Sarthou sa mga pet owners nga mangin responsable sa ila mga hinuptanan.
Samtang ginkumpirmar man ni Sarthou nga posible sa masunod nga bulan pagasugudan na ang rehabilitation sang dog pound.
Handa na ang mga materyales nga pagagamiton sa pag rehabilitate sini, apang indi pa makasugod ang pag-obra sini bangud madamo pa sang mga illegal settlers sa sulod sang dog pound.
Sandig sa record sang City Engineer’s Office may 148 ka mga balay ang natukod sa sulod sang compound sang Dog Pound.
Padayon pa nga gina-asikaso sang siudad ang pagpatuman sang rehabilitation. 12 million pesos ang pondo nga ginpa-in sang siudad para sa pagpatukod sang bag-o nga building kag pagpalapad sang dog pound.
Kun tigayon na nga mapalapad ang dog pound, sarang na ini maka accommodate sang 500 ka mga ido.
[sibwp_form id=1]