Gin kainit sang mga netizens kag animal rights group ang video nga gin-upload sa Facebook sang isa ka local content creator sa sur nga bahin sang Negros Occidental, kon sa diin makita ang pagtampuyong sini sa isa ka ido.
Sa una nga bahin sang 16 seconds nga video sang vlogger nga si JOMOND JTV makita nga may gina-uyatan ini nga ido.
Sa tunga-tunga nga bahin sang video, didto na kag gintampuyong ang ido sang vlogger nga may 2,500 followers.
Bangud sang impact, nagtabog ang ido kag mabatian pa sa video ang pagtiyangak sini.
Nagpanawagan naman ang BACH Project PH nga i-report kag indi na pag-share ang orihinal nga video agud indi na ini makahatag pa sang dugang nga views, engagement kag exposure sa nasambit nga content creator.
Nag-coordinate ang animal rights group sa nagakaigo nga ahensya, local government unit kag mayor’s office sang banwa sang Cauayan sa Negros Occidental agud mahatagan aksyon ang pagmaltrato sa ido.
Nakabutang sa profile sang vlogger nga empleyado siya sang La Carlota City PIO, apang ini ang ginpanginwala sang natungdan nga opisina.
Ang nasabit nga video nga gin-upload sang vlogger sang Lunes, Hulyo 13 ang tubtob karon wala pa ma-delete sa social media.
Ang pagsakit sa mga sapat ang isa ka pagsupak sang Animal Welfare Act, kon sa diin pagkapriso sang tubtob isa ka tuig kag multa nga tubtob P100,000 ang sarang iga-impose sa violator.
[sibwp_form id=1]