Pinaagi sa isa ka sulat sang Scheirman Construction Consolidated Incorporated sa kay Bacolod City Mayor Greg Gasataya, naghingyo ini nga i-ammend ang Joint Venture Agreement sa tunga sang duha ka partido.
Nagapangabay ang private developer sang Yuhum Housing-Arao sa Vista Alegre nga indi na pagdayunon ang una nga agreement nga 25 ka mga buildings ang ipatindog sa amo nga housing project.
Nakasaad sa sulat nga indi na masarangan sang developer nga mapatuman ang una nga agreement bangud sa energy crisis nga ginapangatubang sang pungsod.
Ginsiling ni Mayor Greg Gasataya nga ila man ini iduso sa Sanguniang Panglungsod sang siudad agud matun-an ang posibilidad nga ma-ammend ang amo nga JVA, kasunod sang hingyo sang developer.
Nagpakigsapol na si Bacolod Lone District Representative Alfredo Abelardo Benitez sa Department of Human Settlements and Urban Development agud mahatagan sang solusyon ang problema sa amo nga housing project.
Suno kay Gasataya, apat palang ang nagatindog nga building sa Yuhum Housing sa karun. Duha palang ka building nga may 110 units ang tigayon na nga turn-over.
Makipaghinun-anon pa ang alkalde sa Bacolod Housing Authority sini nga adlaw agud matumod kon untaton anay ang application sang beneficiaries ukon padayunon.
Ang ini nga housing ang kabahin sang ginapatuman nga Pambansang Pabahay para sa Pilipino Program ukon 4PH sa siudad.*
[sibwp_form id=1]