Pagpanakop sang layaw nga ido kag kuring temporaryo anay nga ginpa-untat sang City Veterinary Office samtang ginakaayo ang city pound.
Ginsuguran na sang mga caretaker sang Bacolod City Pound sa Barangay 35 ang pagkaayo sang nagkalaguba nga kennel kag pati na mga gate kag kudal nga nag kalawasak.
Ini agud mapunggan ang pagpalagyo sang mga nasikop nila nga mga layaw nga ido.
Suno kay Dr. John Cabuguason, assistant department head sang City Veterinary Office, temporaryo anay nga maga untat ang impounding team sa pagpang sikop sang layaw nga hinuptanan samtang wala pa makaayo ang city pound.
Nagligad lang nga Enero 28 sang nakapalagyo sa city pound ang 11 ka mga ido matapos ila ginguba ang daan nga mga grills kag mesh wire sa gate sang city pound.
Nagapabilin nga missing ang 11 ka mga ido. Gindugang ni Cabuguason nga magluwas sa plano nga i-rehabilitate ang city pound ginatun-an man ang pagtukod sang dog shelter sa siudad.