Patay si Lilibeth Arandilla, matapos malapakan sang truck nga may karga nga tubo samtang pilason naman ang bana nga si Danilo matapos mabungguan sang jeep ang ila gina sakyan nga tricycle kag naglabog sila sa dalan samtang may naga pakadto nga truck sa Barangay Patic, Pulupandan, Sabado sang aga.
Suno kay Police Capt. Emman Anacleto, hepe sa Pulupandan PNP, padulong sa sur ang tricycle nga ginamaneho ni Danilo kag iya backrider ang iya asawa nga si Lilibeth kag nagasunod ang PUJ sa ila pasulod na sa banwa sang Pulupandan.
Ang Jeep ginamaneho ni Joeffrey Chica, pasulod sa town proper nagasugata sa ila ang 10-wheeler nga may karga nga tubo nga ginamaneho ni Alvin John Cordero.
Sa imbestigasyon sang kapulisan, nabungguan sang jeep ang likod nga parte sang tricycle rason nga ginwarik sang driver ang manibela kabangdanan nga naglapaw sa lane sang truck ang tricycle.
Bangud sa impact, nagtabog ang mag-asawa kag nalapakan si Lilibeth sang truck nga nagresulta sang iya kamatayon.
Samtang, gindala si Danilo sa Bago City Hospital matapos nautod naman iya kamalagko sa kamot.
Ang driver sang truck kag jeep ang yara sa karon sa custodial facility sang Pulupandan Municipal Police Station.*