Nagkadto Lunes sang kaagahon sa Sipalay Police Station ang 26-anyos nga lalaki kag nag-ako nga gingulgulan niya ang iya upod nga construction worker sa Sitio Moning, Barangay Cabadiangan sa Sipalay City.
Ang rason, tungod nga ginhikap sang 37-anyos nga si alyas “Mark” ang pribado nga parte sang lawas sang asawa ni alyas “Christopher”.
Ginsiling ni Police Lt. Cipriano Lumanog III, deputy chief sang Sipalay PNP, naga-inom-inom sanday “Mark” kag “Christopher” sang nanugid ang asawa ni “Christopher” nga ginhikap ni “Mark” ang pribado nga parte sang iya nga lawas.
Naakig si “Christopher” kag gingulgulan niya si “Mark”, gamit ang binangon.
Gindala si “Mark” sa Sipalay City Infirmary kag karon istable na ang kondisyon.
Suno kay Lumanog, wala sang kaso nga ginpasaka sa duha ka construction workers bangud sila ang naka-istoryahanay na kag posible maga-aregluhanay na lamang.*