Isa ka male king cobra nakit-an sa mailum sa Bago City. Gin rescue ini sang isa ka kilala nga wildlife veterinarian.
Kahapon gin post ni Tata McOmish ang picture sang isa ka King Cobra nga nakit-an sa may Purok Kawayanan sa Barangay Mailum sa Bago City.
May mga netizens nga nag alegar nga peke ang photo gani nag post pa gid siya sang video na mismo sang King Cobra.
Nagpangayo sila sang bulig sang Community Environment and Natural Resources Office ukon CENRO sa Bago.
Suno sa pamuno sang CENRO kag PENRO nga si Engr. Joan Gerangaya, natabuan man nga ari diri sa Bacolod ang wildlife veterinarian nga si Dr. Nielsen Donato. Ginpahibalo siya nga may sighting sang King Cobra sa Mailum.
Delikado abe ang pagdakop sa King Cobra suno kay Gerangaya kag kinahanglan sang eksperto para dakpon ini.
Gani kagabi ginpadulong ang area kag iya tigayon nga gin rescue ang King Cobra pinaagi sa pag si-od sini.
Gindala na sa CENRO office ang King Cobra nga gina kabig nga endangered species.