Gindakop sang katapo sang Criminal Investigation and Detection Group ang 64-anyos nga Chinese national kag 32-anyos nga babaye matapos sila ang makuhaan sang masobra P470,000 nga balor sang peke nga Magic Sarap sa entrapment kag buy-bust operations sa Economic Highway sakop sang Barangay Mansilingan, Bacolod City.
Ginpatigayon ang operation matapos makabaton ang CIDG sang reklamo gikan sa manufacturing company angot sa pagpalapta sang peke nga seasoning sa Bacolod.
Sa nasambit nga operation, nagbaligya ang dumuluong sa undercover operatives sang 15 ka boxes ukon P30,000 nga balor sang peke nga seasoning.
Narekober ang 98 ka mga boxes sang peke nga seasoning gikan sa duha ka lain-lain nga manufacturing companies.
Ginabaligya ang nasambit nga mga seasoning sa P2,000 tubtob P2,500 kada box, mas manubo sa original price nga tig-P4,800.
Nadiskubrehan sang CIDG nga gikan sa Manila ang peke nga mga produkto kag gin-transport padulong sa Bacolod sakay sang cargo vessel. Ginabaligya man ang mga ini paagi sa social media.
Ginpasakaan sang kaso nga paglapas sa Intellectual Property Code ang duha ka mga nadakpan.
Nagpaandam ang otoridad sa publiko sang potensyal nga health risks sang pagkonsumo sang peke nga food seasonings, rason nga dapat mausisa anay ang mga produkto antes magbakal ukon sa legitimate nga mga stores lamang.
Suno kay Police Major Christopjer Dulagan, pamuno sang CIDG-Bacolod, ang orihinal nga produkto naka-engrave ang text sang expiration date.
Sa ingredients list, makita sa original packaging nga naka capital letters tanan kag bold ang tinaga nga “EGG” kag “ALLERGEN INFORMATION”.
Manotisyaran man nga may pagka langsa ang baho sang peke nga food seasoning.
[sibwp_form id=1]