Car free Sundays sa dalan Lacson sa Bacolod ang luyag nga mapalawig sang katapo sang konseho. Gin-concur na sang konseho ang ginhinyo ni Mayor Albee Benitez nga pagpatuman sang car free Sunday sa dalan Lacson sugod sa Hunyo 9.
Gani halin las singko sang kaagahon asta las nuebe sang aga, temporaryo nga ipatuman ang road closure sa Lacson Street halin sa Bangga Ramos asta sa North Capitol Road.
Ang South Capitol Road amo ang gintalana nga sarang temporaryo ma-parkingan sang mga salakyan sang mga joggers kag pedestrian.
Ginsiling sang alkalde nga importante nga mapasanyug ang healthy lifestyle dungan sa pagpabaskog sang tikang agud mabuhinan ang carbon emission gikan sa mga salakyan nga isa sa mga ginatudlo naka-apekto sa climate change.
Sa session sang konseho, ginduso ni Councilor Celia Flor nga mapalawig ang amo nga lihok agud mas mapasanyug ang kampanya sa ikaayong lawas kag pagpangapin sa palibot.
Nakit-an ni Flor nga sarang makapasanyog pa sang negosyo sa dalan Lacson ang Car free Sundays kasubong sang nagakatabo sa pila pa ka mga lugar sa pungsod kag abroad.