Isa sa 65 anyos nga lalaki sa Sagay City ang ginasuspetsuhan napatay bangud sang rabies.
Suno kay Rafael Marmolejo ang Rabies Coordinator sang Provincial Health Office, Abril sang nakagat sang ila man hinuptanan nga ido ang 65 anyos kag June 3 napatay ini sang suspected rabies. Wala siya nag pa konsulta sa duktor sang tion nga nakagtan ini kag ginsiling man nga nabakunahan ang ido nga karon ang indi na makit-an. Suno kay Marmolejo, pagdala sa iya sa ospital ginkabig pa ang iya nga kaso nga hypertension case. Sang ulihi nahibaluan nga nakagat siya sang ido. Bangud sini na expose ang mga 27 ka personnel nga naga lakip sang duktor kag mga nurse nga nagtreat sa amo nga pasyente.
“Gindala siya sa ospital during sa stage nga dangerous na siya. Gintakdan pa siya sang IV. Gin-intubate pa siya. Tanan to nga doctor kag nurses na expose sa pasyente. Kun tsakto lang to ang ila assessment wala na siya gina IV wala na siya gina resuscitate, wala na siya gina intubate”, suno kay Marmolejo.
Makalaton ang rabies paagi sa laway suno kay Marmolejo.
Magapatigayon sang case investigation ang PHO upod ang City ukon Provincial Veterinary Office. Sang Enero may bata man nga lalaki sa banwa sang Moises Padilla ang napatay bangud sang suspected rabies. Sang 2023 sa record sang PHO anum ang human deaths bangud sang suspected rabies.