Iga revert ukon ibalik na bilang mga regular hospital ang Valladolid District Hospital kag Valeriano Gatuslao Memorial District Hospital sa Himamaylan City kasunod sang pagnubo sang kadamuon sang Covid – 19 cases sang Negros Occidental.
Suno kay Governor Eugenio Jose Lacson, sa Disyembre uno gina paabot nga ipatuman ini. Ang ospital sa Cadiz ang maga pabilin nga Covid designated hospital.
Pero, suno kay Lacson, kun tigayon na mag bukas ang bag-o nga wing sa Cadiz District Hospital ini na ang maga serbe nga Covid Center kag ang main building naman ang tigayon na maka baton sang iban pa gid nga medical cases. 487 ang active cases sang Negros Occidental as of November 28.
Kun may pagsaka naman sa mga kaso kag kinahanglan ang mga ospital handa naman ang probinsya mag bukas sini para sa mga Covid cases.
Samtang, naga pati si Lacson nga pinaka maayo na ang alert level 2 para sa Negros Occidental.
Madamo na ang naga gwa sa alert level 2 ilakip na mga kabataan. Kun mag alert level 1 pa gid ang probinsya, nagakasayuran nga bukas na para sa tanan. Dapat suno sa gobernador indi gid mag pabaya.