Masobra na lamang sa isa ka bulan kag maga sugod naman ang bag-o nga panghimanwa sa pungsod bisan pa sa siudad sang Bacolod.
Sa national nga lebel, suno kay Frank Carbon ang chief executive officer sang Metro Bacolod Chamber of Commerce and Industry, gin pakamaayo sang mga negosyante nga mag present sang economic agenda sa mangin bag-o nga administrasyon.
Paathag ni Carbon may kabudlayan sila bahin sa ila nga expectation bangud wala napat-od sa kampanya ni presumptive president Ferdinand Marcos Jr ang iya nga economic agenda para sa pungsod magluwas na lamang sang campaign slogan sini nga unity.
Suno kay Carbon ang luyag nila nga ang mga maayo nga nalab-ot sang Duterte administration kasubong sa “build, build, build” pojects sini nga nag hatag sang dugang nga trabaho ang maga padayon kag ang mga wala pa mahuman ang mapadayon para indi man mauyang ang pondo nga napa gwa diri.
“They were not able to translate that to a substantive action plan. So what can you expect from a slogan. But, kami na lang, because we’re preparing for the new administration, so, as early as two months ago, we’ve decided we’re going to make an economic agenda. From the national level, which ihatag namon sa bag-o nga administration, under cabinet secretary, to the regional level, to our new governors and mayors. Meaning kami na lang ma initiate and give it to them and ask for a meeting. We will expand our PPP,”suno kay Carbon..
Sa Bacolod naman, napatpat na damlag pa ni mayor elect Albee Benitez sa mga negosyante kun ano ang luyag niya nga matabo.
Nalakip na diri suno kay carbon ang job creation, ang pag paayo sang kahimtangan ilabi na sang mga wala trabaho kag informal settlers.
Suno kay Carbon, isa sa mga tutukan sa ila pagsugilanon ang mga shoreline barangays.
Dugang pa niya, ang mga negosyante mas gusto sang konkreto nga tikang indi lamang para sa masunod nga 100 days kundi ang matabo sa sulod sang tatlo ka tuig.
Yara na karon sa bag-o nga liderato suno kay Carbon, ang mag pangita sang sources sang pondo para sa mga tinutuyo nga mga proyekto sini nga naga tuyo sa pagpasanyog sa mga magagmay nga negosyo kag mahaylo ang iban pa gid nga mga negosyante nga mag suporta sini.