Ang Barangay Pandanon Silos ang pinaka ulihi nga barangay nga malabyan mo kun padulong ka sa Don Salvador Benedicto.
Sadto anay puro kampo sang tubo lang ang makita sa barangay.
Suno kay Punong Barangay Edna Saldo, pandanon silos ang ngalan sang ila nga barangay bangud sa mga dahon sang pandan nga makita sa kilid sang Bago River kag silos bangud sa halos 300 ka ektarya sang duta sa ila barangay gina panag-iyahan sang pamilya Silos.
Sang nag sugod ang pandemic may mga amat amat nga nag bukas sang mga negosyo sa ila nga barangay. Una diri ang primera parada ukon mas kilala nga Primera Cafe. Buot silingon, first drop.
Overlooking ini sa Mt. Kanlaon kag sa pihak Mt. Canlandog.
Sa idalom makita ang Pandanon River kag ang Bago River.
May malapad nga kadutaan nga sang una gina pa halban sa baka
Suno sa tag iya nga si Lenie Garcia, katubuhan sang una ang ini nga lugar nga gin convert nila sa isa ka cafe resort bangud sang matahum nga view.
Wala sila maglaum nga kada weekend kadamo sang bikers, riders pati na mga pamilya nga naga padulong diri para mag relax. Ilabi na nga pwede man mapaliguan ang suba sa idalom.
Magluwas sa primera may mga cafe man nga nag bulukas sa higad lang sang dalan. May yara sang Mulberry Hills Cafe kag Simboryo Garden Cafe nga natung-an man sang Bulkan Kanlaon kag sang Canlandog.
Para kay Punong Barangay Saldo, dako ini nga bulig sa barangay ilabi na sa dugang nga trabaho nga nahatag sini sa mga pumuluyo
Kun sa iban, dako nga halit ang pandemic sa ila nga palangabuhian… Diri sa ila barangay, ini ang nangin yabe para ma diskubre ang gina tanyag nga katahum sang ila nga lugar.