Ginakabig sang Bureau of Jail Management and Penology Negros Island Region nga dako nga pagpanghangkat sa una sini nga tuig ang magutok nga mga jail facilities sa rehiyon.
Ini ang ginpahayag ni BJMP-NIR Spokesperson Atty. Juniven Rey Umadhay, kadungan sang ila pagsaulog sang una nga anibersaryo sang BJMP NIR kag ika-35 nga anibersaryo sang BJMP.
Suno kay Umadhay isa sa mga pagatutukan sang BJMP ang pagpatukod sang dugang mga pasilidad sa rehiyon.
Nagtanyag na sang duta kag pondo para sa pagpaubra sang dugang nga jail facility ang siudad sang Cadiz, samtang may nagapadayon naman nga pagpatukod sang isa ka facility sa San Carlos City.
Nagtanyag naman ang siudad sang Bacolod sang duta para patindugan sang dugang nga jail sa siudad.
Nagaginutok nagid ang mga jail facilities bangud sa kadamuon sang mga preso, ilabi na sa Bacolod City kag Silay City suno sa iya.
May 32 lamang ka jail facility ang Negros Island Region kag masobra sa 8,000 ka mga preso ang yara diri.
Dinapit nga bisita si Public Safety Undersecretary Jed Patrick Mabilog sa anibersaryo sang BJMP-NIR. Iya ginpahayag nga nagalibot sila sa karon agud matumod ang mga kinahanlanon sang BJMP sa tagsa ka rehiyon.
Handa man ang gobyerno nasyonal suno kay Mabilog, nga maghatag sang pondo para sa pagpatukod sang dugang nga mga pasilidad.
[sibwp_form id=1]