PDRRMO photo
Sang Hwebes gin paidalom man ang banwa sang Binalbagan sa state of calamity.
Suno kay Engr Jernie Rondin ang Municipal Disater Risk Reduction Management Officer sang Binalbagan, sa session kahapon sang Sangguniang Bayan gin-aprobahan ang resolution nga naga paidalom sa banwa sang state of calamity.
Ang Binalbagan isa sa mga banwa kag siudad sa probinsya nga labing apektado sang pag ulan kag pagbaha dala sang habagat nga gin pabaskog ni bagyo Crising sang nagligad nga semana.
Suno kay Rondin, 41,597 ka persona gikan sa 13 ka mga barangay sa banwa ang gin-evacuate dala sang malain nga panahon.
May kahalitan man sa masobra sa 56 ka ektariya sang humay kag mais. Kag masobra sa 2 million pesos ang balor sang kahalitan sa fisheries kag high value commercial crops.
Ang deklarasyon sang state of calamity maga tugot as LGU sa pag gamit sang disaster funds sini para mabuligan ang mga apektado.
Antes pa man ang deklarasyon sang state of calamity sang bilog nga probinsya suno kay Rondin na endorse na nila ang MDRRMC resolution sa SB.
Ginsiling ni Governor Eugenio Jose Lacson nga ang deklarasyon sang probinsya sang state of calamity pwede na magamit sang mga LGU nga basehan para ma usar ang ila nga disaster funds. Pero ginsiling man sang gobernador nga pwede sa gihapon maka declare sang state of calamity ang tagsa ka apektado nga LGU.