Probinsya sang Negros Occidental ang nagdeklara na sang state of calamity.
Sa special session sang Hwebes, unanimous nga gin aprobahan sang Sangguniang Panlalawigan ang resolution nga naga paidalom sa bilog nga probinsya sa state of calamity bangud sang tropical storm “Crising” kag outbreak sang red striped soft scale insect ukon RSSI nga naga apekto sa mga katubuhan sa Negros Occidental.
Sa resolution sang Provincial Disaster Risk Reduction Management Council naka saad nga ang pagbubo sang ulan dala sang habagat nga gin pabaskog sang Tropical Storm “Crising” ang nag tuga sang daku nga kahalitan sa propiedad, nag displace sang mga pamilya kag nag apekto sa mga palangbuhian.
Suno sa PDRRMC 21 ka local government units ang labing apektado kag 35,312 ka pamilya ang na apektuhan.
Sa July 25 nga report sang Regional Disaster Risk Reduction Management Council ang agricultural damage sa Negros Occidental dala sang ulan kag baha tuga sang habagat ang nagdangat sa masobra P55M.
Samtang, malapit sa 3,000 hectares sang sugarcane plantation ang na igo sang RSSI.
1,574 ka farmers suno sa Sugar Regulatory Administration monitoring as of July 9, 2025 ang apektado.
Suno kay Governor Eugenio Jose Lacson ang declaration sang state of calamity wala lamang nagatugot sa mga LGUs sa pag gamit sang Quick Response Fund.
Kabahin naman ini sa preparation sa panugod sang typhoon season.
Ang declaration maga tugot man sa SRA, sa pag fast track sang pag bakal nila sang insecticides para mapamatukan ang paglapta sang RSSI.
Damage tuga sang RSSI sa probinsya ang gina project nga yara sa P350M suno sa SRA.
