Bangud sa asod-asod nga kaso kinawatay sa Bacolod City, ginahaylo na sang Sangguniang Panlungsod ang kapulisan kag ang pamunuan sang mga Barangay nga magpatuman sang hugot nga pagbantay sa tagsa nila ka lugar agud matapna na ang mga kawatan.
Sa isa ka resolution nga ginpasa ni Councilor Em Ang, iya ginsiling nga wala na sang may ginapili nga oras ang mga snatcher kag kawatan kag nagatuga na ini sang kahadlok sa publiko.
Ginapangabay sang SP sa kapulisan kag mga barangay tanod nga pabaskugon ang ila presensya sa mga dalanon, residential areas, kag mga merkado adlaw man ukon gab-i agud mauntat na ang mga kinawatay.
Dugang pa, ginahaylo man sang SP ang Barangay nga mag coordinate sa siudad agud ma-identify ang mga crime prone areas sa ila nga lugar.
Ang pagpakay-o sang mga guba kag pag-install sang mga dugang pa nga CCTVs kag mga street lights ang isa sa mga solusyon nga nakita sang SP batuk sa kaso sang kinawatay.
Sa record sang Bacolod City Police Office, nagsaka sa 35 percent ang kaso sang kinawatay sa siudad sa bulan sang Agosto.
Pagpanghangkat man suno sa BCPO ang masami nga indi pag report sang mga biktima sa kapulisan.
[sibwp_form id=1]