Wala sang naga lagaw nga killer sa Bago City. Ini ang ginpaathag sang Bago PNP sa naglapta nga balita nga may duha ka mga killer sa siudad.
Sa Facebook live sang Bago City PNP kaina sang aga ginpaathag sang pamuno sang Police Community Relations nga si P/CPL Jessica Benguelo nga wala sang kamatuoran ang nag lapta nga balita nga may duha ka mga killers sa siudad nga amo ang nagpatay sa isa ka persona sa Barangay Napoles sang Domingo.
Suno sa kay Benguelo isa ka isolated case ang natabo nga pagpatay sa kay Christopher Garde sang Barangay Libacao sa Himamaylan City nga nasapwan sa may Barangay Napoles nga natukiban nga isa ka drug personality.
Farm helper ang biktima kag may kaso angut sa iligal nga droga kag naka gwa sa bilangguan bangud sang plea bargaining agreement.
Suno pa kay Benguelo makaguba sa imahe sang siudad ang report nga may duha ka mga killer nga nag igo sa ila nga siudad gani gilayon sila nga nagpagwa sang paathag.
Indi ini kuno matuod kag sala ang report.
Samtang padayon naman ang pagkilala sang PNP sa suspek sa pagpatay sa kay Garde.