Sa video nga kuha ni Jhay Min Sae, makita pa ang naga daba-daba nga kalayo sa sulod sang balay nga gina istaran sang Japanese National nga si Gaiji Fukoda sa Purok Lumboy, Barangay Tabugon sa Kabankalan City kahapon sang aga.
Wala na maka gwa pa ang Japanese National sa nagakasunog nga balay nga gintunaan sang iya nga kamatayon.
Suno sa kay FO3 John Direck Villaruz, imbestigador sang Kabankalan Bureau of Fire Protection, las diyes singko sang aga nila nabataon ang fire call. 38 kilometros ang kalayuon sang Tabugon gikan sa BFP station sa Kabankalan City proper.
10:35 naka abot sa area ang fire truck bangud sang kalayuon kag talakalaron nga barangay ang natabuan sang sunog.
Sa impormasyon nga ila nakuha wala na maka gwa pa sa ginatulogan nga kwarto ang biktima. Gintinghuaan pa sang iya nga ugangan nga makuha siya sa kwarto pero pagbukas nila sang puertahan, dako na katama ang naga ibwal nga kalayo.
Gina usisa pa sang BFP kun ano ang ginhalinan sang kalayo. Base sa report, nagdangat sa P178,000 ang halit sang sunog.
Gindala ang bangkay sang Japanese National sa Bacolod City para ma-autopsy.
Gina tun-an sa karon sang Kabankalan LGU kag BFP ang posibilidad nga butangan sang sub-station sa Tabugon bangud sang kalayuon sini sa barangay proper kag para maka responde man sa mga kaiping nga mga barangay.