Sindikato nga responsable sa mga pagpangawat kag pag panghold-up gina-monitor sang kapulisan pinaagi sa gintukod nga tracker team.
Nakuhaan sang CCTV video ang pag pang hold-up sang tatlo ka mga lalaki nga nagasakay sa motorsiklo sa Barangay Mansilingan sa Bacolod sang kagab-i.
Sa Barangay Handumanan, may tatlo man ka lalaki nga naka helmet ang nang hold-up sa isa ka computer shop Martes sang kaagahon.
Suno kay Police Captain Lelanie Lagoting, commander sang Police Station 10, mabudlay mag identify sa mga suspek nga naka bonnet kag naka helmet pero nakapakig angut na sila sa iban pa nga police station agud makilal-an ang nang hold-up sa computer shop.
Nagapati naman si Bacolod PNP Director Col. Noel Aliño nga mahimo isa ka grupo ang responsable sa nagaluntad nga pagpang hold-up.
Gina monitor naman karon sang kapulisan kun konektado ang mga responsable sa grupo sang sindikato nga mahimo may kaangtanan man sa mga kaso sang pagpangawat sa pila ka mga barangay sa siudad.