Sa Thanksgiving ceremony sa Bacolod City Police Office headquarters ginpasalamatan ni BCPO Director Police Colonel Joeresty Coronica ang bulig nga napalab-ot sang Bacolod LGU sa pagpamuno ni Mayor Albee Benitez para sa mga kapulisan.
Ginsaysay ni Coronica nga paagi sa kabilugan nga masobra sa P111M nga financial support natigayon ang mga insfrastructure kag logistical support upgrades.
Nalakip diri ang dugang mga police mobile patrol units kag ang ginapatuman nga reward system para makabulig sa pagsolbar sang mga nagluntad nga kriminalidad.
Ginakalipay naman sang alkalde nga antes siya magbiya sa pwesto para magserbe bilang congressman natigayon nga nasuguran ang construction sang P20M nga Police Station 3 sa Barangay Mandalagan.
Ginapaabot sang alkalde nga paagi sa pagpasanyog sang mga pasilidad kag pati na mga equipment sang kapulisan mas mapabaskog pa ang mga kampanya para sa peace and order sang siudad.
Kabahin sa nagtambong sa seremonya si PRO-Negros Island Region Officer in-charge Police Brigadier General Arnold Thomas Ibay.