Ginkonsulta na sang siudad sang Bacolod ang pamilya Gonzaga nga naghatag sang duta nga ginatindugan sang Bacolod City Government Center sa posible nga saylohan sang mga vendors nga yara sa palibot sang BCGC.
Sa inisyal nga pag-istoryahanay ni Mayor Greg Gasataya sa pamilya Gonzaga, naghingyo ang alkalde kun sarang sang pamilya nga mahatagan sang isa ka lugar ang mga vendors.
Ginsiling ni Atty. Mark Steven Mayo, City Administrator, nga kon maghatag gid man ang pamilya Gonzaga sang pribado nga lugar, kinahanglan na nga magbayad sang renta ang mga vendors.
Nagpasalig man ang siudad nga himuon nila ang tanan agud indi man matam-an ang mga vendors sa ila balayran para sa private area.
Dugang ni Mayo, posible nga adlaw-adlaw ang bayranay sang renta kun magsugot ang mga vendors. Apang wala pa matumod kon pila gid man ang ihatag nga rate bangud nagapadayon pa ang negosasyon.
Ginklaro man ni Mayo, nga kinahanglan sang siudad nga mag sunod sa deed of donation nga nagamando sa ila nga i-maintain nga hilway ang palibot sang BCGC sa mga business activities.
Natalana nga igademolish ang mga baligyaan nga nahamtang sa palibot sang BCGC sa Biyernes, Marso 6.*
[sibwp_form id=1]