Ginsiling ni Bacolod City Councilor Homer Bais, pamuno sang Committee on Environment nga ila ginapangayo sa Bacolod Environment and Natural Resources Office ukon BENRO ang evaluation kag assessment sa performance sang ISWIMS nga nagakoleta sang basura sa siudad sa sulod sang anum ka bulan.
Ginahaylo man ni Bais ang ISWIMS nga maghatag sang opisyal nga pahayag kag paathag kun ngaa madamo sa gihapon sang naga reklamo nga delayed ukon wala makolekta ang basura sa ila nga lugar.
Sandig sa kasugtanan sang ISWIMS kag sang siudad, yara sa 800 tubtob 850 cubic meters ang kadamuon sang basura nga kinahanglan hakuton sa bilog nga siudad kada adlaw, apang bangud sa kadamuon sang basura, nagdangat na sa masobra 1,000 cubic meters ang ila ginakolekta.
Apisar sini, madamo sa gihapon ang nagareklamo nga mga residente nga wala mahakot ang basura sa ila nga barangay. Tubtob sa karun, wala pa sang opisyal nga pahayag ang garbage collector may angut diri.
Ginahulat pa sang siudad ang resulta sang ginpatigayon nga Waste Analysis and Characterization Study, agud matumod kun ano gid man ang kadamuon sang basura nga kinahanglan mahakot sang collector kada adlaw.
Ginaduso man ni Bais nga kinahanglan mag-present sang six months nga report ang ISWIMS sa siudad agud mahibaluan kun naga comply gid man sila sa kasugtanan.
327.9 million pesos ang bayad sang siudad sa ISWIMS agud magkolekta sang basura humalin Enero tubtob Disyembre sin inga tuig. Dugang pa diri ang 109 million pesos nga kontrata para sa pag-maintain sang sanitary landfill sa Barangay Felisa.
[sibwp_form id=1]