Takna las 10, Martes sang aga, dungan nga ginpahuni sang mga barko sa Bredco Port sa Bacolod City ang ila mga siren bilang panugod sa isa ka bulan nga selebrasyon sang Maritime and Archipelagic Nation Awareness Month ukon MaNa Mo 2026.
Ini ang ginpangunahan sang Philippine Coast Guard Bacolod City Substation bilang pag-ugyon sa nationwide nga selebrasyon.
Sandig sa pahayag sang National Maritime Council, ang paghuni sa mga siren ang isa ka pamaagi sa pagdumdom sang kapuslanan sang kadagatan sa tagsa ka Pilipino.
Ang kadagatan ang suno sa ila, nagaserbe nga alagyan agud magpadayon ang mga hilikuton sa pungsod nga nagahatag sang palangabuhian, nagapasangkad sa ekonomiya, kag ini man ang nangin kabahin sa identity sang pungsod.
Ginpahanumdom man sang NMC nga ang tagsa ka Pilipino ang may responsibilidad sa pagtatap kag pag pangapin sang baybayon kag magpakigbahin sa mga isyu may kaangtanan sa kadagatan sang Pilipinas.
[sibwp_form id=1]