Siudad sang Bacolod ang may 21 na tanan ka mga pasyente napatay bangud sang COVID-19 sini lamang nga bulan sang Nobyembre.
Sandig sa record sang Bacolod City Health Office, as of November 10 may dos shentos trentay uno ka mga bag-o nga kaso sang COVID-19 sa siudad kag 21 ang napatay.
Base naman sa record sang Bacolod Emergency Operations Center, 147 na tanan ang nagkalamatay kag 344 karon ang mga active cases sa siudad.
Ginpahayag ni Bacolod Vice Mayor El Cid Familiaran nga mas huben karon ang edad sang mga nagkalamatay sa COVID-19 sa siudad.
Ini bangud suno sa iya, pila sa mga biktima ang wala nagpa swab test sang makabatyag sang mga sintomas kundi nagpadulong nalang sa ospital sang ginbudlayan na sila sa paginhawa.
Suno kay Familiaran, indi dapat magkampante ang publiko kag padayon sa gihapon nga maghalong bangud may posibilidad nga ibalik naman sa modified enhanced community quarantine ang Bacolod kun liwat nga magtaas ang mga kaso sang COVID-19.