Bacolod City maga-host sang nahauna nga Terra Madre Asia Pacific sa madasun nga tuig. Ini ang ginapaabot nga makabulig sa bahin sang turismo kag sa pagkilala sang siudad kag pungsod bilang global food hub.
Sa pagbukas sang Terra Madre Visayas, gin-anunsyon ni Mayor Albee Benitez ang natalana nga hosting sang Bacolod para sa Terra Madre Asia Pacific 2025.
Ini ang nahauna nga international event sang Slow Food International sa Asia nga ginalauman sang alkalde nga makapabaskog pa sang food tourism para mas makilala ang siudad bilang global food hub. Ini bangud man sang ginapabugal nga native delicacies kag cuisine sang mga Bacolodnon kag Negrense magluwas sa mga organic products.
Gindayaw ni Tourism Secretary Christina Frasco ang pagpili sa Bacolod kag iya man ginpahayag nga ini ang panugod para mas makilala ang pungsod bilang global food hub.
Ang Terra Madre International event ang ginapangunahan sang Slow Food Movement, isa ka global campaign nga nagasakdag sang naturally kag organically grown food products sa tuyo nga mapangapinan ang palibot.