Ginsiling ni Bacolod City Legal Officer Karol Joseph Chiu, nga sang Lunes nga adlaw ila na ginpakakas ang lima ka hayob-hayob nga yara mismo sa kilid sang 4th-Lacson Streets.
Apang Martes sang aga, may mga nabilin pa nga parte sang hayob-hayob kag may mga tulog sa higad sang dalan.
Suno kay Chiu, may ara gid sila sang kabudlayan sa pagtinlo sang dalan, bangud matapos na nga ma clear ang lugar, nagabinalik man sila sa gihapon.
Dugang niya, magluwas nga hugot nga ginadumilian ang pag-istar kag pagbaligya sa kilid sang dalan, makita man ang kahigko sang lugar.
Sa karun, ginalantaw sang siudad ang posibilidad nga mahatagan sang salaylohan ang mga naga-istar sa lima ka hayob-hayob.
Samtang, kadungan sang ila operasyon sang Lunes, liwat man nga ginpahalin sang enforcement team ang mga nagabaligya sa South Capitol Road.
Suno kay Chiu, makapila na kabeses nga ila ginatinluan ang amo nga dalan, apang nagabalik man sa gihapon ang mga vendors.
Sandig sa vending ordinance sang siudad, ginadumilian ang pagbaligya sa South Capitol Road.
Matapos maglapta ang video sang pagsabtanay sang isa ka senior citizen nga vendor kag sang enforcement team, ginmanduan man ni Chiu ang mga empleyado nga respetohon ang mga vendors samtang ginapatuman ang laye.
[sibwp_form id=1]