Ginahulat nalang sang siudad sang Bacolod ang resulta sang classification testing sang basura nga yara sa Old Dumpsite sa Buri Road, Barangay Mandalagan kag ang pag-approve sang disposal plan.
Ini agud tigayon na nga mahakot ang mga basura kag maula na sa cell number 5 sang Sanitary Landfill sa Barangay Felisa.
Ginsiling ni Bacolod City Legal Officer Karol Joseph Chiu, nga indi man basta- basta makuha ang basura sa old dumpsite kun wala pa ini ma classify kay basi may mga hazardous materials diri.
Ginapaubra man sang siudad ang mga private companies sa dumpsite sang ila nga oath of undertaking.
Suno kay Chiu, diri magasaad ang mga kompaniya nga sila ang mahakot sang mga basura gikan sa dumpsite kag ang Bacolod LGU naman ang magahikot sa Sanitary Landfill nga ulaan sini.
Nagsaad man suno sa iya ang mga kompaniya nga willing sila mag comply sa tanan nga pagsulundan sang siudad, apang sa karun, ginahulat pa ang final nga disposal plan gikan sa Environmental Management Bureau – Negros Island Region.
Ang undertaking ang mangin paagi man suno kay Chiu nga mapasiguro nga indi makutkot ang mga basura samtang wala pa sang final nga disposal plan.
[sibwp_form id=1]