Paghiwat sang Bacolaodiat Festival sa siudad sang Bacolod sa pagsaulog sang Chinese New Year buas nga adlaw ang ginpaiway anay.
Isa ka executive order ang ginpagwa ni Bacolod Mayor Evelio leonardia nga opisyal nga nagapaiway sang paghiwat sang Bacolaodiat Festival sini nga tuig bangud sang COVID-19 pandemic.
Ang Bacolaodiat Festival ang isa sa mga dako nga selebrasyon sang Bacolod may kaangtanan sa pagsaulog sang Chinese New Year kada tuig.
Madamo nga mga turista ang nagabisita sa Bacolod para magtambung sa ini nga kahiwatan.
Pero sandig sa EO sang alkalde, ipaiway lang anay ang kahiwatan buas nga adlaw bangud importante nga mapangapinan ang ikaayong lawas sang publiko.
Bilang pagsaulog sang Chinese New Year, gindekorasyunan sang Bacolaodiat Festival incorporated ang fountain area sang Bacolod City Government Center.
May mga nagakabit nga Chinese lanterns sa mga poste, nagalutaw nga lotus flowers sa tubig sang fountain kag imahen sang Chinese zodiac character nga ox bangud ginakabig nga year of the metal ox ang 2021.
Ginpahayag ni Odette Ong–Gomez sang Bacolaodiat Festival Incorporated nga bisan wala sang Bacolaodiat Festival, sarang nga saulogon ang pagsulod sang Chinese New Year sa tagsa ka mga panimalay.