Gina-trace karon sang kapulisan ang ginikanan sang baby boy nga nakit-an sa sulod sang eco bag kag gin-abandonar sa hilamonan nga sakop sang Barrio Dos, Barangay Guadalupe sa San Carlos City, Negros Occidental.
Mga estudyante nga pakadto eskwelahan ang nakasapo sa bag-ong bun-ag nga bata, matapos nila mabatian ang hibi sini mga las 6 sang aga sadtong Lunes, Agosto 10.
Napuno sang balas ang lawas pati mata sang lapsag, nga ginabulobanta tatlo pa lang ka adlaw ang edad.
Ginsiling ni Police Captain Rodney Sarona, deputy chief sang San Carlos PNP, nga sa karon nagapabilin sa ospital ang bata kag yara na ini sa istable nga kondisyon.
Ginturn-over ang lapsag sa paghinakop ka social worker sang Department of Social Welfare and Development.
Samtang, padayon pa ang follow-up operation sang PNP agod makilal-an ang ginikanan sang lapsag.
“Continuous pa ang WCPD conduct follow-up, coordinate to sila sa Barangay Guadalupe kag sa mga nearest ospital kag mga birthing center. As of now wala pa gid kita idea kung sin-o gid to ang mother nga nag-abandon. Ang infant ara subong sa hospital ang DSWD ang naga-asikaso. Gina-check ta subong ang mga residents ta di. Pero so far wala pa gid, ginkuhaan ta ang mga barangay officials ta waay pa man sila info kay basi bala indi man taga dira sa Brgy. Guadalupe, basi bala sa iban man nga barangay kay amo ni gina continuous man follow-up sang WCPD,” suno kay Capt. Sarona.*
[sibwp_form id=1]