Ginaplano nga Animal Shelter sa Barangay Granada ang ginapangitaan sang lugar nga pwede pa masayluhan.
May yara na sang disensyo kag plano para sa igatukod nga Animal Shelter sa Barangay Granada nga mangin pinakadako kuntani nga shelter sa pungsod.
Ugaling ginsiling ni Mayor Albee Benitez nga may yara sang problema sa terrain amo nga nagapangita sila karon sang option kag lugar nga sarang masayluhan sang igatukod nga shelter.
May P10M nga pondo gikan sa loan agreement ang ginpain para sa proyekto nga ginapaabot masuguran kuntani sa Abril.
May isa ka ektarya ang kalaparon sang animal shelter nga kabahin sang 27 hectare property nga nabakal sang siudad.
Sa amo nga propiedad ginaplano itukod ang BJMP facility, bag-o nga patyo kag iban pa nga government infrastructure project.
May yara man sang investor nga luyag mag-arkila sang duta para sa ginaplano nga solar farm project.