Anay Isabela mayor Joselito Malabor kag duha ka iban pa nga punong barangay nga naga pangatubang sang kaso nga murder ang nagsungka sa National Bureau of Investigatuon paagi kay Vice Governor Jeffrey Ferrer.
Si Malabor, mga punong barangay Amy Locsin sang Sebucauan kag Armando Cordero sang Maytubig, ang nalakip sa ginpasakaan sang kaso nga murder angut sa pagpatay sa kay Moises Padilla Councilor Jolomar Hilario sadtong 2019.
Suno kay Malabor, politically motivated ang paglakip sa ila sa kaso, labi na nga taga Isabela man sila. Ini ang ila ginakabig man nga harassment.
Naga laum sila nga tigayon nga maka piyansa. Ila na nga ginpadangat sa Department of Justice ang ila nga kaso kag naga laum sila nga ma-dismiss.
Ang tatlo ang gin-turn over sa National Bureau of Investigation. Personal nga nagpadulong sa talatapan sang bise gobernador si NBI Bacolod chief, Atty Renoir Baldovino para sila ang iga-custody.
Sang Setyembre 2021, nagsungka man paagi kay Vice Governor Ferrer ang vice mayor sang Moises Padilla nga si Adrian Villaflor kag Councilor Jimmie Don Plaza nga nalakip man sa amo nga kaso.
Suno kay Atty Joemax Ortiz ang abogado, sa kabilugan anum na ang nagsungka sa mga akusado. Yara ang kaso sa RTC Guihulngan.
Suno kay Ferrer, tungod sang pagsalig sang mga natungdan kun ngaa natigayon ang pagsungka paagi sa iya nga talatapan.