Isa ang Baciwa-PrimeWater sa 73 ka mga natukod nga joint venture agreement nga karon luyag sang Bayan Muna Partylist upod sa grupo sang Amlig Tubig kag Baciwa Employees Union nga ma-terminate.
Kahapon dungan sila nga nagpalab-ot sang petition letter sa Malacanang agud ihinyo kay Presidente Ferdinand Marcos, Jr., nga ma-cancel ang mga JVA kag matigayon ang immediate provision sang matinlo nga water supply.
Sa katapo sang media ginpahayag ni Benjie Oray, president sang employees union nga humalin sang nag take over ang kumpanya nga ginapanag-iyahan sang pamilya Villar sang 2020, wala nasolbar ang problema sa kakulang kag kalidad sang water supply sa siudad.
Kabahin sa ila ginahinyo ang pagbaton sang back wages humalin sang nakakas sa trabaho ang 59 ka mga empleyado.
Ginpahayag ni Mayor Albee Benitez nga may yara sang ginapatuman nga review sa kontrata sa tunga ang Baciwa kag PrimeWater.
Samtang wala pa ang resulta, padayon nga naga-coordinate ang Bacolod LGU sa water distirubution utility agud matigayon ang mga proyekto kag mga tikang nga mangin sabat sa malawig na nga problema sa supply sang tubig sa siudad.