Pagligwat sang ordinansa ginaduso agud mapaiway ang pagbayad sang late filing fee sang mga taxpayers tuga sang delay sa releasing sang mga titulo gikan sa Regristry of Deeds.
Nagligad pa nga Nobyembre sang na-delay ang pagbaton sang mga judicial forms sang City Registry of Deeds resulta sang backlog sa issuance sang mga titulo sang duta sa mga landowners.
Resulta sini ang pagbayad nila sang late filing fee sa City Assessor’s Office sang Bacolod tungod man sang delay sang proseso sa pag-transfer sang ila mga titulo.
Isa ka babaye nga negosyante ang nagpalab-ot sang reklamo sa Isugid Kay Mayor sa pagpati nga indi dapat sila ang magalukdo sang penalidad nga indi man sa ila halin ang kapaltahan.
Ginsiling ni Mayor Albee Benitez nga dapat mapatuman ang amendment sa natukod nga ordinansa agud nga mahilway ang mga tax payers sa pagbayad sang penalidad samtang nagapadayon ang problema angut sa kakulang sang judicial forms sa ROD.
Ginpaathag ni City Assessor Atty Maphilindo Polvora nga nakasaad sa City Ordinance 627 series of 2012 nga sa bahin sang transfer sang real property ownership kinahanglan nga ma notify ang City Assesor sa sulod sang 60 days.
Ang mapaslawan sa pagproseso sang dokumento ang magabayad sang late filing fee sa indi magnubo sa 1/4 sang 1 percent sang assessed value sang propiedad.
Si Registrar of Deed Atty. Raymond Danico, nagpasalig sang issuance sang certification para sa ginaduso nga amendment agud matagaan konsiderasyon ang mga nagaproseso sang ila mga dokumento bahin sa ila titulo sang duta.
Gindugang ni Danico nga isa sa mga kabangdanan sang kakulang sang judicial forms amo ang construction boom kun diin nagadamo nga nagamo ang township kag subdivision project sa Bacolod kag probinsya.