Isa ka abandonado nga Hyundai Accent nga nagadu-ag gray ang nakit-an sa higad sang kampo sa Sitio Sool, Barangay Gargato sa banwa sang Hinigaran, Miyerkules sang hapon, Oktubre 29.
Nagalapta ang dugo sa sulod sang salakyan kag buka ang windshield sini.
Nag-gwa sa imbestigasyon sang Hinigaran PNP nga posible indi sa lugar ginbuka ang windshield bangud wala sila sang may nakita nga mga traces sang mga buka. Posible, nga buka na nga daan ang windshield sang gin-drive padulong sa lugar.
Makita sa sulod sang salakyan ang pila ka mga personal nga gamit, parilyahan, icebox, kaserola, tumbler, aluminum foil, botelya sang softdrinks, kag iban pa.
Ginkilala sang otoridad ang tag-iya sang salakyan nga amo si Kristine Joy Dignadice, 42-anyos, taga Canetown Subdivision sa Barangay 19-A, Victorias City. Isa siya ka freelance businesswoman kag nagabaligya sang mga beauty products.
Base sa online verification portal sang Professional Regulation Commission, isa man ka registered nurse ang tag-iya sang salakyan.
Suno sa mga himata nga nagpadulong sa Hinigaran PNP, las 5 sang kaagahon Miyerkules sang naghalin si Kristine Joy sa Victorias kag tubtob karon ang wala pa makapauli. Unattended naman ang iya cellphone.
Sa karon, naga-backtracking ang kapulisan sang CCTV footages sa dalan nga posible gin-agyan sang salakyan kag padayon pa nga gina-usisa ang ulihi nga na-contact kag nakaupod sang biktima.*