Ginpaidalum sa random drug test subong nga adlaw ang 100 ka mga drivers sang bus, taxi, tricycle kag jeep, pati na konduktor kag dispatcher sa North Bound Terminal sa Bacolod City.
Base sa resulta, anum sa ila ang nag-positibo sa pag-gamit sang iligal nga droga. Ang apat nga nag-positibo amo ang driver sang modernized jeep, samtang ang duha ang nagamaneho naman sang traditional jeep.
Iga-subject pa ang mga nagpositibo sa confirmatory test. Ipadala ang resulta sang mga nagpositibo sa laboratory sang Philippine Drug Enforcement Agency sa Cebu.
Ginkumpiskar sang Land Transportation Office ang mga driver’s licenses sang mga nag-positibo kag samtang nagahulat sa resulta sang confirmatory test, temporaryo nga indi sila anay maka-biyahe.
Ginpatigayon ang drug test sang katapo sang LTO-Negros Island Region, upod ang Highway Patrol Group kag PDEA, bilang kabahin sang Oplan Biyaheng Ayos para sa Undas 2025.
Suno sa LTO, magapadayon ang random drug testing sa mga drivers sang pampubliko nga salakyan agud mapasiguro ang safety sang riding public.*