Shadow

92 ka mga pamilya nag evacuate sa Talisay City bangud sang baha

YouTube player

Si Alfon Bulkan sang Barangay Zone 8 sa Talisay City, aga pa gin evacuate na ang iya nga pamilya gikan sa ila nga balay. Kay nag amat-amat na saka ang tubig baha. Naga puyo sila sa higad sang minuluan bridge. Gani kun lawigay nga pag ulan kag mag awas na ang tubig sa suba, naga amat amat na sila biya sa ila nga balay kag panghimos sang mga gamit.

Kaina naga daludo ang tubig sa suba. Gani wala sila anay nag pinauli sa ila nga mga balay kay delikado pa.

Sa parkingan sang salakyan sang isa ka pamilya sila nag evacuate bangud yari ini sa nataasan nga bahin sang ila nga lugar. Treinta sila ka mga pamilya nga nag evacuate.

Suno kay Sheila Mae Hechanova, nagsukat ang isa ka bulan sang ulihi nga pagbaha sa ila nga lugar subong nga adlaw. Enero otso, tuman man kuno kadako sang tubig baha diri.

Kaupod man nila nga nag evacuate si Asel Obinque.Enero beinte dos napatay ang amay ni Asel matapos mag ubog sa baha nga may pilas. Na infect ang iya nga pilas sang mahigko nga tubig.

Sa Barangay Zone 14B naman may isa man ka purok nga ginbaha. Amo man sini ang ila nga sitwasyon basta lawigay nga pag ulan. Suno sa mga residente mga duha man ka tuig nga wala sila ginbaha. Subong lang liwat nga tuig.

Sa Dos Hermanas, sisentay dos ka mga pamilya ang gin evacuate. Humalin sang kagab-i mabunok ang ulan tubtob sang aga. Ini ang rason kun ngaa nag awas ang tubig sa suba kag nagsulod sa mga pamalay.

Kaina may mga rescuers kag taga DSSD nga naga libot para maghatag sang bulig sa mga ginbahaan.

Sandig sa record sang Talisay City PIO, 92 tanan ka mga pamilya ukon 285 ka indibidwal ang nag evacuate bangud sang baha.

Secured By miniOrangeSecured By miniOrange