80 ka mga personnel mangin kabahin sang Task Force Kontra Colorum Tricycle sa siudad sa Pebrero 20.
Nagsapol na kaina ang katapo sang gintukod nga Task Force Kontra Colurom Tricycle nga ginalakipan sang Committee on Transporation sang konseho, Bacolod Traffic Atuhority Office kag City Legal Office Enforcement Team.
Suno kay Major Junji Liba, pamuno sang BTAO, may 80 tanan ka mga personnel halin BTAO kag City Legal Office ang mangin kabahin sang task force nga magapanakop sang mga colorum tricycle sa Pebrero 20.
Ang dugang nga augmentation personnel ang magapaidalom pa sa training seminar sumugod sa weekend.
Sa record sang komitiba may malapit 15,000 ang mga tricycle drivers kag operators sa siudad.
Masobra sa pito ka libo diri ang wala pa naka-renew kag wala sang mga permit halin sa siudad.
Mangin kaupod man sang Task Force ang mga Tricycle Operators and Drivers Association sa pagpasiguro nga lehitimo nga mga miyembro ang nagabyahe sa pila ka mga rota sang tricycle sa Bacolod.
Ang Task Force Kontra Colorum ang kabahin man sang tikang sang local government agud nga mapahagan-hagan ang pag-gutok sang dalanon sa siudad.