Nagluntad ang flashflood sa tatlo ka mga barangay sa banwa sang Cauayan matapos sang wala-untat nga pag-ulan nga ginsugata pa sang hightide kahapon.
Sa video nga kuha ni Kagawad ni Erlina Dorimon makita nga nagpalahigad na lang ang mga motor kag tricycle bangud sang naga dalom nga tubig.
Ang matag-as lang nga mga depasahe nga salakyan, truck kag bus ang makasarang ubog sa baha. Suno kay Mayor John Rey Tabujara nga humalin Lunes sang gab-i nagtupa ang ulan sa ila nga banwa nga gintunaan sang pagtaas sang tubig apang labi pa gid ini nga nagtaas sang ginsugata sang taob.
Bangud sini, naglapaw na ang tubig sa highway sang Barangay Mambugsay, Tiling kag Poblacion nga nagsulod pa sa mga kabalayan kag baligyaan.
Suno kay Mayor Tabujara, may pila ka mga residente nga temporaryo nagbiya sa ila mga puluy-an apang nagbalik man matapos nga amat-amat na nga nagtahaw ang tubig-baha, Martes sang kasisidmon.
Dugang pa sang alkalde nga ang pagbaha ang resulta sang pagpang-utod sang kahoy sa kabukiran kag ang development sa highway rason nga wala na sang alagyan ang tubig.