Isa sa pinakamasako nga dalan sa Bacolod City ang La Salle Avenue kun may klase, apang kaina las siyete sang aga halos wala sang mga salakyan nga nagalabay diri.
Ini kasunod sang pag-suspend sang University of Saint La Salle sang face-to-face nga klase bilang kabahin sang security measures.
Sa isa ka advisory, ginsiling sang USLS, sumugod subong nga adlaw tubtob sa Miyerkules, mangin online anay tanan nga klase samtang ila pa gina-verify ang ginasiling isa ka “security matter.”
Wala na sang may ginpagwa nga dugang nga statement ang unibersidad tuhoy sa rason sang pagkansela sang klase.
Samtang, kanselado man ang face-to-face classes sa St. Scholastica’s Academy of Bacolod City humalin subong nga adlaw tubtob sa Biyernes, samtang nagapatigayon pa sang academic retreat ang eskwelahan.
Apang, kaina sang aga, makita ang salakyan sang SWAT sang Bacolod sa gwa sang eskwelahan. Bakante man ang parking space nga masami puno sang salakyan kun may klase.
Ang isa naman ka preparatory school nga malapit lamang sa amo nga eskwelahan ang nagpagwa man sang abiso nga kanselado man ang klase tubtob sa Miyerkules.
Sa ila announcement, ini ang isa ka precautionary measure bangud may security threat sa mga kaiping sini nga mga eskwelahan.
Apesar nga wala sang face-to-face classes ang nasambit nga mga eskwelahan, bukas man sa gihapon ang ila opisina sa mga luyag magtransaksyon.
[sibwp_form id=1]