Totally destroyed ang duha ka mga puluy-an samtang partially damaged naman ang isa pa gid ka balay sa nagluntad nga sunog sa Sitio Pitgong, Barangay Oringao sa Kabankalan City, Lunes nga adlaw.
Sa inisyal nga imbestigasyon sang Kabankalan City Fire Station, may nabatian nga lupok ang isa ka pumuluyo malapit sa circuit breaker sang ila balay antes nag-igrab ang kalayo.
Nasunog man ang tatlo ka mga naka-park nga motorsiklo nga ginagamit sang mga pumuluyo sa lugar.
Malayo ang lugar gani suno sa Kabankalan Bureau of Fire Protection, wala sila gilayon maka-responde.
Madasig nga naglapta ang kalayo bangud himo sa light materials ang mga nagkalasunog nga balay kag mabaskog ang huyop sang hangin.
Nagbinuligay ang mga pumuluyo agud tapnaon ang kalayo.
Tatlo ka mga pamilya ang apektado sang sunog kag P20,000 ang halit sang kalayo.