Kahapon makit an pa ang naga tibi nga tangkal sa bibi sang pangpang sang nagluntad ang landslide sa Purok San Jose sa Barangay Alijis sa Bacolod.
Pero bangud sang pagbunok sang ulan dala sang Bagyo Agaton, nagdahug naman paidalom ang tangkal.
Pati ang nag usmod nga duta nga ginatindugan sang puluy an sang pamilya tabanao ang amat amat nga gina ab-ab sang tubig baha gikan sa malapit nga suba.
Si Cherry Ann Tabanao nagsaylo na sa evacuation center sa dona Emilia J Garcia Elementary School upod sa beinte sais pa ka mga pamilya nga nag evacuate halin kahapon.
Pero ang iya otsenta anyos nga lolo,amay kag manghud nga lalaki ang wala pa maghalin sa ila balay bisan delikado.
Kaina may pila pa ka mga pamilya nga hana mag evacuate sa eskwelahan kadungan sang pagbunok sang ulan.
Temporaryo naman nga gin sira kaina sang aga ang Rosario Street sa Bacolod bangud sang natumba nga puno sang punok sa compound sang Boy Scouts of the Philippines nga opisina.
Delikado kay may mga live wire nga nagkala utod. Pero gilayon man nga nag abot ang mga taga drrmo kag ginpang utod ang mga sanga nga naga balabag sa dalan.
Padayon naman ang paghuyang sang pwersa sang Bagyo Agaton pero ginapaabot ang mas malawig nga inulan karon nga semana santa tungod man sang bagyo basyang nga nagsulod na sa Philippine Area of Responsibility base sa sa weather advisory sang PAG-ASA.
Gani ang pamunuan sang CDRRMO ang nag rekomend na nga matagaan sang relocation site ang 30 ka mga pamilya nga nagapuyo malapit sa natiphag nga duta sa Purok San Jose kag Purok Roadside nga nasakpan sang Barangay Alijis.
Pabor diri ang mga pumuluyo ugaling hinyo nila nga kuntani malapit lang sa ila gina ubrahan ang ila mangin salayluhan.
Magluwas sa Barangay Alijis, may 12 pa ka mga pamilya ang gin evacuate tungod sang baha sa barangay banago kahapon. May 32 man ka pamilya ang nagpaidalom sa pre emptive evacuation sa Barangay Cabug.