21 ka mga estudyante ang gindala kaina sang aga sa City Health Office sang Talisay matapos nga nasakitan sang tiyan kag napalanuka.
Suno kay Ian Arnold Arnaez ang spokesperson sang DepEd Negros Occidental Division ang insidente natabo mga las 8 sang aga kag gilayon nga gindala sa Talisay CHO ang mga kabataan agudto madapatan sang medical attention.
Duha sa 21 ka estudyante ang yara sa grade 3, apat sa grade 4 kag 15 sa grade 5.
Sa inisyal nga pagpangusisa ang mga kabataan ang nagkaon sang expired nga tsokolate.
Suno kay Dr Joey Villarosa ang Division Medical Officer nga nag padulong mismo sa Bubog Elementary School kun sa diin natabo ang insidente, nakabutang sa nabilin kag wala pa mabuksan nga mga tsokolate nga September 17, 2024 ang expiry.
“Nag acute abdominal pain sila, nag nausea vomiting, gindala sila sa City Health Office”, suno kay Villarosa.
Isa ka estudyante man ang nagdala sang amo nga mga tsokolate sa eskwelahan.
Pero as of press time indi niya mapat-od kun bala ini ang ginbaligya sang estudyante ukon ginhatag sa iban nga estudyante.
“Indi pa kami sure kun gin baligya gid man sang bata ang tsokolate. Pero, most definitely gindala sang bata sa sulod sang iya nga bag, or gindala ya bitbit ya sa iya person, nagsulod siya sa iya classroom, either ginpanghatag ya or baligya ya”, suno kay Villarosa.
Ini ang isa ka isolated case suno kay Dr Villarosa.
Samtang, sa pagsulundan sang DepEd ang pag baligya sang pagkaon sa eskwelahan ang ginatugutan paagi sa canteen.
Gani kun gin baligya gid man ang tsokolate indi ini sanctioned sang eskwelehan ukon DepEd.
Samtang, ginsiling naman ni Arnaez nga gin papauli na ang 21 ka mga estudyante kag sila ang ginhatagan sang reseta.