Nagkalaguba ang 20 ka mga balay sa higad sang baybay sa duha ka mga barangay sa banwa sang Hinigaran, Negros Occidental matapos ang pag-igo sang buhawi, mga las 6:45 sang aga, Huwebes, Hulyo 9.
Base sa records sang Provincial Disaster Risk Reduction and Management Office, may walo ka partially damaged houses sa Punta Pasil, Barangay Tagda; samtang pito sa Sitio Raming kag tatlo sa Punta Tanulo, sakop sang Brgy. Pilar.
Ginsiling ni Hinigaran Mayor Grace Arceo, may duha pa ka dugang nga mga naguba nga balay sa Punta Pasil ang gina-verify sang Municipal Disaster Risk Reduction and Management Office.
Suno sa mga pumuluyo, ang buhawi ang nagporma sa lawod kag nagpadulong sa mga pamalay sa higad sang baybay.
Wala sang reported nga nasamaran sa insidente.
Sini nga hapon, nagpanghatag ang banwa sang GI sheets para maislan ang mga nagkalaguba nga atop sang mga apektado nga pumuluyo.
“We have 20 nga na-identify bala nga partially-damaged kay ang buhawi sa babaw siya nag-agi so ang ila mga atop amo to siya ang na-igo kag nalupad gid. Nagturn-over na kami subong nga hapon sa amon nga MDRRMO sang mga sin ukon GI sheets para i-replace to sa mga nagub-an bala atop,” pahayag ni Mayor Arceo.*
[sibwp_form id=1]