Sakay sa Toyota Vios nga awto ang duha ka mga gin-alegar kawatan sang inugbulang nga manok sang sila ang na-corner sang kapulisan, sa bulig sang mga barangay tanod.
Nadakpan ang duha ka mga suspek samtang naga tinguha nga magpalagyo sa Barangay Ma-ao sa siudad sang Bago kaina sang kaagahon.
Suno kay Police Capt. Emman Anacleto, deputy chief sang Bago Component City Police Station, gikan ang mga suspek sa Barangay Mailum, kun diin sila ang nagpangawat sang mga inugbulang nga manok kag namutikan.
Pagkatabo sang pagpangawat, na-report gilayon sa mga naga-duty nga tanod, rason nga ila ginsundan ang salakyan sang mga kawatan samtang naga-coordinate sa mobile patrol sang Bago City Police Station.
Nakuha sa front seat sang salakyan ang tatlo ka buhi nga mga inugbulang nga manok nga naputos pa sang screen.
Suno kay Anacleto, naghana nga mag-gabot sang pusil ang isa sa mga suspek, apang pagkita nga armado ang mga nagresponde nga kapulisan, iya ginbutang sa compartment ang pusil.
Narekober sang kapulisan ang caliber .38 firearm nga may apat ka mga bala.
Sang tinalikdan nga mga semana, nakabaton ang kapulisan sang duha tubtob tatlo ka mga reports gikan sa mga pumuluyo sang Brgy. Mailum, nga sila ang ginkawatan sang manok.
Suno kay Anacleto, nagtawag sa ila ang pila ka mga police stations sa probinsya nga may reported man nga kinawatay sang inugbulang nga manok.
Gin-abi-abi naman sang kapulisan ang ka-epektibo sang roving kag coordination sang mga barangay tanod sang Mailum kag Maao sa madasig nga pagkilala sang salakyan kag sa pagdakup sang mga suspek.
Pasakaan sang kaso nga theft kag violation sang Republic Act 10591 ukon Comprehensive Firearms and Ammunition Regulation Act batuk sa duha ka mga suspek.