Sa video nga makita sa social media post ni Bacolod Traffic and Transportation Management Department Deputy Jose Antonio Robello, makita sa CCTV video ang akto nga pagpangawat sang steel plate sang duha ka mga wala makilal-an nga persona nga sakay sa tricycle sa likod sang Riverside Medical Center sa 23rd Lacson Street sa Bacolod.
Ginsiling ni Robello nga ila na gintugyan sa kapulisan ang pagpang-usisa agud makilal-an kag madakpan ang mga responsable nga persona.
Sa amo man nga post makita ang isa pa ka insidente sang pagpangawat sang kasubong nga steel plate nga ginatabon sa manhole sa 13th Lacson Street.
Gani nagapati si Robello nga mahimo sila man ang may kahimuan sang krimen.
Nagapangabay karon sang bulig ang BTTMD sa publiko para madakpan na ang amo nga mga persona.